შვედეთის უმაღლესი განათლების სისტემა ხშირად მოიხსენიება როგორც ინოვაციის, ხარისხისა და რელევანტურობის მოდელი გლობალურ აკადემიურ სივრცეში.

ხსენებული მოდელის მიდგომა აჩვენებს, თუ როგორ შეუძლიათ უნივერსიტეტებს დააბალანსონ მკაცრი აკადემიური სტანდარტები და პრაქტიკული უნარების განვითარების აქტივობები, რის შედეგადაც მიიღება ისეთი კურსდამთავრებულების ნაკადების მიღება, რომლებსაც გააჩნიათ, არა მხოლოდ, მაღალი დონის პროფესიული განათლება, არამედ მზად არიან, მნიშვნელოვანი წვლილი შეიტანონ საზოგადოებისა და ეკონომიკის განვითარებაში. სხვა ქვეყნებს საშუალება აქვთ ისწავლონ შვედეთის მაგალითიდან, რაც გულისხმობს კვლევის ინტეგრირებას ბაკალავრიატისა და მაგისტრატურის საფეხურებზე, კრიტიკული აზროვნების ხელშეწყობას და უზრუნველყოფას, რომ სასწავლო პროგრამები მჭიდროდ იყოს შესაბამისობაში ინდუსტრიის საჭიროებებთან. ვინაიდან ხსენებული მოდელი რეალურ სამყაროში პრაქტიკულ გამოყენებაზე არის ფოკუსირებული, სტუდენტები აღჭურვილი იქნებიან როგორც თეორიული ცოდნით, ისე პრაქტიკული კომპეტენციებით, რაც უფრო და უფრო აუცილებელი ხდება თანამედროვე შრომით ბაზრებზე.

განსაკუთრებით აღსანიშნავია, შვედური განათლებისთვის დამახასიათებელი კვლევის ადრეული და სტრუქტურირებული ინტეგრაცია სასწავლო პროგრამებში. სფეროდან გამომდინარე, სტუდენტები კვლევით საქმიანობას იწყებენ, ზოგიერთ შემთხვევაში, პროგრამის დაწყებიდან რამდენიმე კვირაშიც კი. ხოლო დისციპლინებში, რომლებიც უფრო სიღრმისეულ მომზადებას მოითხოვს, კვლევის კომპონენტის ინტეგრირება საბაზისო კურსების გავლის შემდეგ ხდება. კვლევითი საქმიანობის ადრეულ ეტაპზე დაწყება ხელს უწყობს დამოუკიდებელ აზროვნებას, პრობლემების გადაჭრის უნარების განვითარებას და სამუშაო სფეროს პრაქტიკულ გაგებას, რასაც სტუდენტებისთვის როგორც აკადემიური, ისე პროფესიონალური წარმატება მოაქვს.

კვლევის გარდა, შვედეთის უნივერსიტეტები პრიორიტეტს ანიჭებენ პრაქტიკულ გამოცდილებას სტაჟირებისა და ინდუსტრიული თანამშრომლობების მეშვეობით. სტუდენტები ხშირად გადიან სტაჟირებას სასწავლო შესვენებების დროს, რაც მათ საშუალებას აძლევს რეალურ სამყაროში გამოიყენონ სწავლით დაგროვებული თეორიული ცოდნა, გამოავლინონ ხარვეზები თავიანთ უნარებში და უკეთ გაერკვნენ კარიერული გზის სირთულეების სპეციფიკაში. ხსენებული გამოცდილება საშუალებას აძლევს სტუდენტებს, პრაქტიკული პერსპექტივიდან დაინახონ თავიანთი კურსების მნიშვნელობა და უზრუნველყონ, რომ ის რასაც სასწავლო დაწესებულებაში ითვისებენ, პირდაპირ ერგება სამუშაო ადგილის მოთხოვნებს.

ადრეული კვლევის შესაძლებლობებისა და მკაფიოდ სტრუქტურირებული პრაქტიკული გამოცდილების შერწყმით, შვედეთის უმაღლესი განათლების სისტემა სამაგალითოა სასწავლო დაწესებულებებისთვის, მსოფლიოს მასშტაბით. მოდელი ხაზს უსვამს სტუდენტების არა მხოლოდ გამოცდებისთვის, არამედ საკლასო ოთახის მიღმა ცხოვრებისთვის მომზადების მნიშვნელობას, რაც ადაპტირებადი, კვალიფიციური და სამუშაო ძალისთვის ღირებული კურსდამთავრებულების მომზადებას გულისხმობს. სხვა უნივერსიტეტებისთვის შვედური მიდგომის ისეთი ასპექტების დანერგვას, როგორიცაა კვლევაზე ორიენტირებული სასწავლო გეგმები, ინდუსტრიასთან შესაბამისობაში მყოფი პროგრამები და შინაარსობრივი სტაჟირების შესაძლებლობები, შეუძლია მნიშვნელოვნად გაზარდოს უმაღლესი განათლების აქტუალობა და შედეგიანობა.